Australia ka njoftuar se do të heqë kufizimet e ashpra për importet e mishit të viçit nga Shtetet e Bashkuara, duke hequr masat që u kritikuan nga presidenti amerikan Donald Trump.

Ministrja e Bujqësisë Julie Collins tha se qeveria do të heqë kufizimet e biosigurisë pasi një “vlerësim rigoroz shkencor dhe i bazuar në rrezik” zbuloi se rreziqet e sëmundjeve po menaxhoheshin nga ana e SHBA-së.

“Australia qëndron për tregti të hapur dhe të ndershme – industria jonë e bagëtive ka përfituar ndjeshëm nga kjo,” tha Collins në një deklaratë.

Australia, e cila ka disa nga masat më të ashpra të biosigurisë në botë, deri më tani nuk ka pranuar mish viçi nga bagëtitë e rritura në Kanada dhe Meksikë, por të therura në SHBA.

Canberra hoqi një ndalim për mishin e viçit nga lopët e rritura dhe të therura në SHBA, i futur në përgjigje të një shpërthimi të sëmundjes së lopës së çmendur, në vitin 2019, raporton Aljazeera.

Ky veprim vjen pasi Trump kritikoi kufizimet e Australisë për mishin e viçit amerikan në njoftimin e tij të 2 prillit “Dita e Çlirimit” për tarifa gjithëpërfshirëse ndaj dhjetëra vendeve.

Australia, e cila eksporton rreth 70 përqind të mishit të saj të viçit, është ndër furnizuesit kryesorë të mishit të kuq në SHBA, por konsumon pak mish viçi amerikan.

Australia, e cila i është nënshtruar tarifës bazë prej 10 përqind të Trump që nga prilli, eksportoi rreth 26,000 ton mish viçi në SHBA në tre javët e para të korrikut, sipas statistikave qeveritare.